GARAIZ: 60 t.m.

Aretoko estreinalditik abiatuta Baionako Oldeak estudioan eta Errenteriako Niessen eta LekuOna Kultur Fabrika espazioetan eginiko egonaldien emaitza da. Gonbidatu berezi gisa aritu dira Oier Guillan kanpo begirada lanetan eta emanaldioro arituko den Alaia Martin idazle eta bertsolaria. 360º-ko espazio kokaerarekin hitzak pisua irabazi dute mugimendu eta musikarekiko lotura berriak ezarriz.

Denborak uneoro zeharkatzen gaitu eta azalerak, bolumenak, ibilbideak eta joan-etorriak ditugu horren lekuko. Denborak uneoro besarkatzen gaitu eta azala, nortasuna, adina eta harremanak ditugu horren lekuko. Denborak uneoro laztantzen gaitu eta maitasuna, bakardadea, higadura eta menpekotasuna ditugu horren lekuko.

Denbora da lekukoa eta heldulekua. Zer iragan da, zertan ari gara eta zeri begira jarriko gara? GARAIZ gaude oraindik: zertarako?

Gorputzak eta enborrak mugimenduan, dantza, zuzeneko musika eta hotsak higiduran, eta hitzak ibiltari, ahoz gora eta idatziz. Bi dantzari, bi musikari eta idazle bat denbora zizelkatuz.

Lan honetan DENBORA zukutu nahi da mugimenduaren bidez, musikaren bidez, eszenografiaren bidez eta Idazle baten berariazko pasarteekin. Denbora eszenikoki arakatu eta ikertu da lengoaia ezberdinak uztartu eta publikoak zentzumen ezberdinen bidez pertzibitu dezan. Era berean denboraz hausnartuarazi nahi da, bere izaera eta aldaera ezberdinetan: denbora organikoaz, giza-denboraz… iraganaz, orainaz eta etorkizunaz, ikuspegi humano eta kritikoz.